डोंबिवली पलावा परिसरातील कारू वाईन अँड डाईन च्या मालकाकडून शासनाची फसवणूक, ठाणे अधीक्षकांकडून अनुज्ञाप्ती रद्द करण्याचे आश्वासन

डोंबिवली पलावा परिसरातील कारू वाईन अँड डाईन च्या मालकाकडून शासनाची फसवणूक, ठाणे अधीक्षकांकडून अनुज्ञाप्ती रद्द करण्याचे आश्वासन

पोलीस महानगरच्या शिष्टमंडळाला अनुज्ञाप्ती येत्या मार्चपर्यंत रद्द करणार असल्याची ग्वाही

बदलापूर, अंबरनाथ, उल्हासनगर व कल्याण डोंबिवली परिसरातील परमिटरूम धारकांवर येणार संक्रांत

पोलीस महानगर नेटवर्क

डोंबिवली – डोंबिवलीच्या पलावा परिसरात असलेले कारू वाईन अँड डाईन या परमिटरूमधारक व्यक्ती डोंबिवली राज्य उत्पादन शुल्क अधिकाऱ्यांच्या डोळ्यादेखत करचुकवेगिरी करत आहे. लाखो रुपये खर्च करून, प्रसंगी कर्ज काढून, प्रशासकीय प्रक्रिया पुर्ण करून, रीतसर एखादा व्यक्ती देशी-विदेशी मद्य विक्री व्यवसाय चालू करतो, त्यातून शासनाला महसूल भेटत असतो पण परिसरातील काही परमीट रूम चालवणारे मालक वाईन शॉप सारखे काऊंटर चालू करून बेकायदेशीरपणे देशी-विदेशी मद्य विक्री करून शासनाचा करोडो रुपयांचा महसूल बुडवला जातोय. मात्र राज्य उत्पादन शुल्क स्थानिक अधिकारी थातुरमातुर कारवाई करून शासनाच्या बुडणाऱ्या महसूलापेक्षा त्यांच्या खिशाकडे अधिक लक्ष असतो.

मुळात महाराष्ट्र राज्यात परमिट रूम, रेस्टॉरंट, बार, क्लब व इतर ठिकाणी दारू पिण्यासाठी आणि विकत घेण्यासाठी राज्य उत्पादन शुल्क खात्याचा परवाना घेण्याची गरज असते. राज्य उत्पादन शुल्क विभागाची मद्यविक्री करण्यासाठीची नियमावली ही कठोर आहे. मात्र, मद्यविक्रेते या नियमावलीचे पालन करत नाहीत, हे वास्तव आहे. कधीही यावे आणि दारू घेऊन जावे, असा प्रकार डोंबिवलीच्या कारू वाईन अँड डाईन मध्ये सुरू आहे. परमिट रूमचा परवाना असताना इतर ठिकाणावरून देशी-विदेशी मद्य आणून ते परमिटरुम बाजूला वाईन शॉप सारखा हुबेहूब काऊंटर उभा करून बेकायदेशीरपणे एमआरपी किंमतीत मद्य करून शासनाचा महसूल बुडवला जात आहे. विशेषतः शहरातील व परिसरातील वाईनशॉप पेक्षा परमिटरूमवर अनधिकृतरित्या होणारी दारू विक्री अधिक असल्याची माहिती सूत्रांकडून समोर येत आहे. परमिटरूम धारकांकडून शासनाला कसलाच नफा होत नाही, शासनाच्या नाकावर टिच्चून दिवसाढवळ्या बिनदिक्कत, राजरोसपणे मद्य विक्री केली जाते. सदर परमिट रूमचे मालक इतर वाईनशॉपच्या मालकांकडून देशी-विदेशी मद्य कमी दरात खरेदी करून परमिटरूमच्या काऊंटरवरून शासनाचा कर बुडवून फसवणूक विक्री केली जाते.

काय आहे कायदा?

परवाना नसताना मद्य बाळगणे तसेच परवाना नसलेल्यांना मद्यविक्री करणे हा गुन्हा आहे. ग्राहकाकडे परवाना आहे की नाही, हे पाहण्याची आणि त्यासाठी योग्य ती सोय उपलब्ध करून देण्याची जबाबदारी विक्रेत्यांवर टाकलेली आहे. या नियमांचे कोणीही मद्यविक्रेता पालन करत नाही. एकाही मद्य विक्री दुकानात मद्य सेवन परवाना विचारला जात नाही

वेळेच्या बंधनाची ऐशी की तैशी

उल्हासनगर, कल्याण, डोंबिवली व इतर परिसरात परमिटरूम मध्ये बसून मद्य प्राशन करण्यासाठी सकाळी ते रात्री वेळेचे बंधन घालून दिलेले आहे. मात्र या परिसरातील परमिटरूम धारक रात्री ३.३० वाजेपर्यंत परमिटरूम चालू ठेऊन मद्य विक्री करतात हा सर्व गैरप्रकार दैनिक ‘पोलीस महानगर’ च्या प्रतिनिधीने आपल्या कॅमेरात कैद केला आहे तसेच डोंबिवलीतील कारू वाईन अँड डाईन या परमिटरूमचा परवाना रद्द करण्यासाठी राज्याचे उपमुख्यमंत्री व उत्पादन शुल्क मंत्री अजितदादा पवार, राज्य उत्पादन शुल्क आयुक्त डॉ. विजय सूर्यवंशी, ठाणे जिल्हाधिकारी, निरीक्षक, डोंबिवली यांना निवेदन देण्यात आले असून ठाणे अधीक्षक प्रवीण तांबे यांची प्रत्यक्ष भेट घेऊन कारवाई करण्याची मागणी केल्यावर फक्त त्याच रात्री थोडा वेळ कारवाई करून ‘कारू वाईन अँड डाईन बंद करण्यात आले. त्या नंतर पुन्हा जैसे थे परिस्थिती. म्हणजे एकंदरीत आम्ही मारल्यासारखे करू तुम्ही रडल्यासारखे करा असली थातुरमातुर कारवाई होणार असेल तर मग शासनाचा कर वसूल होणार कसा असा प्रश्न निर्माण होत आहे. संबंधित प्रशासकीय यंत्रणा कारवाईच्या नावावर चिरीमिरी घेऊन शांत बसतेय अशी चर्चा जनतेतून होताना दिसत आहे. याबाबत ठाणे राज्य उत्पादन शुल्क अधीक्षक प्रवीण तांबे यांच्याशी पोलीस महानगर च्या पत्रकाराने भ्रमणध्वनीद्वारे विचारना केली असता कोणताच प्रतिसाद मिळू शकला नाही यावरून या अधिकाऱ्याची उदासीनता दिसून येते…